Publiquei orixinalmente esta reportaxe en culturagalega.gal o 11 de novembro de 2015
No alto do monte Trega (A Guarda) vívese unha auténtica aventura. Os arqueólogos están a reescavar 2.300 metros cadrados dun dos castros máis grandes de Galicia, nunha área investigada antes da Guerra Civil. Malia iso, o equipo leva xa máis de 30.000 pezas exhumadas que documentan a relevancia e a intensidade das relacións entre os habitantes do castro do Trega co mundo mediterráneo, o complexo urbanismo da área e a antigüidade da súa fundación.
Mercé a un protocolo entre a Deputación de Pontevedra e o Ministerio de Fomento, o primeiro dos organismos está a cometer un proxecto para crear recursos turístico-culturais a través de dezoito xacementos de época galaicorromana na provincia. O Trega, unha das principais atraccións turísticas de Galicia, levaba desde 1988 sen ser escavado. O barrio que a xente adoita visitar hoxendía é o coñecido como Barrio Calvo. Os arqueólogos orientáronse cara outra terraza próxima pero que dominaba estratexicamente o esteiro do Miño: o barrio Mergelina.