La French, cine de acción con coordenadas europeas

Con incrible pracer vin en Cineuropa La French, un filme de Cédric Jiménez que coloca en escena, e en competencia, a dous soberbios actorazos do cine francés, Jean Dujardin e Gilles Lellouche. A historia, que nos resultará próxima, narra a loita do xuiz Pierre Michel (Jean Dujardin) contra La French Connection, a organización mafiosa que se apoderou da economía local marsellesa e da costa azul entre os anos 70 e 80 e que baseou o seu poder na exportación de heroína aos Estados Unidos. A película é trepidante, tenche atrapado mesmo nunhas cadeiras tan incómodas como as do Salón Teatro, e está construída concedendo intelixencia ao espectador: as personaxes son poliédricas, complexas, teñen pasado e sentimentos encontrados fronte ao mundo. O final, que non desvelarei, é un final cabal para unha película que trata dunha basura con tanta capacidade de infiltración social como as bandas do narcotráfico. Para min sen dúbida, un dos grandes filmes deste 2014.