iPhone 6 Plus? Máis ben Mini iPad Mini

Foto: Tim Cook, CEO de Apple, presentando os novos modelos

Levo dous días cun iPhone 6 Plus de Apple. Como sabedes, é o modelo “grande” do novo lanzamento que fixo a compañía da mazá. Decidín optar por este modelo por dous motivos: o primeiro é que, aínda que eu recibo moitas chamadas, o meu principal uso do teléfono adoita ser máis como asistente persoal (axenda, mapas, documentación, comunicación electrónica), así que me parecía interesante un teléfono que me dese unha maior comodidade de lectura. O segundo é o gran problema dos smartphones, estas baterías tan limitadísimas, que no meu caso do anterior iPhone 5 non me daban chegado ao día e me facían vivir situacións incómodas se tiña chamadas importantes ou necesidades de consulta da información a partir das sete e media ou oito da noite.

Tras dous días de uso do iPhone 6 Plus creo que xa podo facer algunhas valoracións. O primeiro, confirmar por enésima vez como a Internet se volve histérica para ben e para mal cada vez que se lanza un novo produto de Apple, e a cantidade de paridas que poden circular impunemente pola rede. Nin bendgate (a tontería esa de doblar o teléfono) nin problemas relevantes co iOS8 (que ademáis, Apple tarda horas en solucionar como moito) nin outras chorradas. O teléfono funciona perfectamente e un desastre coma min pode levalo no pantalón e tranquilos, que non dobla. Agora ben, se queredes poñervos de pé sobre o seu borde e facer dúas piruetas, machacalo nun iunque con dúas mazas de troll e agardar que non casque a pantalla ou tiralo a unha trituradora de lixo e agardar que saia impune, o problema sabedes que o tedes vós, máis que o iPhone.

Con respecto á batería, é certo: dura moito máis (tarda máis en cargar, claro) e convirte o teléfono nun elemento moi cómodo. E con respecto ás dimensións, pois aí é onde a decisión é máis subxectiva e persoal. Efectivamente, se o que buscas é un teléfono móbil, eu recomendaríate a versión inferior, o iPhone 6. Se o que buscas é un asistente para o teu traballo, se cadra o iPhone 6 Plus sexa unha mellor decisión. E atención á xente que lle gusta ler: lese estupendamente ben nesta máquina. É como levar un libriño no peto, que agora si podes ler comodamente alí onde esteas. A experiencia de usuario distánciase do móbil para entrar noutra categoría de produto. Por iso, a sensación que me deu o teléfono no seu conxunto (un teclado máis grande e cómodo) é que en realidade Apple, no iPhone 6 Plus, estanos a vender un Mini iPad Mini.

E aquí vén o asunto curioso: dun tempo a esta parte a política de unificación dos produtos de Apple fai que teñan a sensación de que en realidade, o que estou a adquirir son pantallas, máis que hardware. É dicir, adquiro un tamaño para unha experiencia que é case común en todas as súas máquinas. Non acabo de ter en conta que iso, para o consumidor, sexa bo a medio prazo. A ralentización de vendas de iPad, por exemplo, pode ter moitas causas, pero unha delas sen dúbida é o feito de que é unha máquina tan boa que non ten sentido cambiar por outra da compañía ata que o ciclo tecnolóxico literalmente a desborde. Esta sensación de mercar pantallas de tamaños distintos, máis que ordenadores distintos, é complicada e controvertida. Non teño un criterio final sobre ela.