Zárate é un apelido sinónimo de calidade e bo facer nos viños do Salnés. Este Zárate Tras da Viña 2004, vinificado a partir dunha parcela de 0.6 has a partir de cepas prantadas nos 70 é un auténtico canón de viño, unha explosión de notas salinas, minerais, e tonos equilibrados, balanceados. Quedan moi poucas botellas deste albariño de dez anos que segue conservando unha acidez impecable e lonxeva. Coñecino grazas a Eva Pizarro, na sesión que impartiu con Iago Castrillón e que tiven o pracer de moderar, sobre a “nova tradición” galega de sala. A botella abriuse o luns para o Fórum gastronómico e hoxe aínda probei no restaurante unha copa desa botella: impresionante a evolución só en dous días dun viño dunha lonxevidade magnífica. Unha demostración máis de que cos albariños, como dixo Eva Pizarro, estamos continuamente cometendo “infanticidios”.
Be First to Comment