“De castros a castelos”, unhas orixinais e interesantes xornadas en Carnota

Son un absoluto entusiasta dos ecosistemas creativos: cando creas un contorno, un ambiente de creación, a paixón diversifícase de xeito organizado: por iso a cultura hai que fomentala de xeito aberto, creando ‘campos de xogo’ que dean lugar a iniciativas policéntricas. Isto está a acontecer en Carnota, onde a Asociación Monte Pindo Parque Natural acaba de montar unhas xornadas de luxo, “De castros a castelos”, moi orixinais no seu prantexamento. Celebraranse en Carnota o 1 e 2 de xuño, e son un complemento fantástico para os proxectos arqueolóxicos en curso no concello e no debate xeral no país sobre estes momentos da nosa Historia:

Durante dous mil cincocentos anos, boa parte de Galicia foi unha paisaxe fortificada. Desde a Idade do Ferro ata a caída dos Irmandiños a finais da Idade Media, Galicia viviu un intenso proceso de fortificación e construción de estruturas defensivas e militares. Comprender os procesos de cambio, as causas da fortificación e da súa decadencia son as claves das Xornadas de Historia e Patrimonio “De Castros a Castelos”, que se celebrarán na Casa do Concello de Carnota o 1 e 2 de xuño, organizadas pola Asociación Monte Pindo Parque Natural.

Participarán arqueólogos e historiadores especialistas nas diferentes épocas, nun programa completísimo. Os prezos de asistencia, de aloxamento e comida para os que queiran vir pasar eses dous días a Carnota son moi populares (habitacións a 20 euros, manutención a 10, inscrición a 5 euros). Pódense presentar comunicacións. Toda a información está dispoñible no web das xornadas. E aquí tamén podes acceder ao programa.