Viñotrucos do Alcampo

Aviso para profesionais do supermercado: o outro día achegueime ao Alcampo de Área Central (si, aínda hai xente que vai a Área Central). Despois de explorar o outlet de A Nosa Terra, fumos facer a compra de supervivencia ao Alcampo e perdimos algo de tempo nos viños. Chamáronme a atención a venda de viños xenéricos de diferentes denominacións de orixe francesas. As botellas levaban o capuchón de recomendados por Alcampo, algo que é moi habitual nas enormes adegas da cadea nos supermercados que ten en Francia. Sempre son viños decentes nunha relación de calidade-prezo moi boa. Pois ben, había viños da Borgoña, do Ródano, de Bergerac ou de Burdeos a prezos que oscilaban entre os 3 e os 8 euros. Eu probei Ródano, Bergerac e Borgoña (o máximo valía cinco euros) e levei unha franca sorpresa. Serían como viños-definición, algo así. Tanto o Bergerac coma o Ródano expresaban exactamente o sabor inconfundible dos viños desas rexións francesas, eran unha pura definición do viño da súa terra e, polo tanto, máis que aceptables. Así que xa sabedes, é para ir polo Alcampo e saquear as francesadas a tres ou catro euros. Son destas cousas que ocorren poucas veces!