Fáltannos en Galicia festas do viño novo, do viño que está un pouco por facer. En Francia, pola contra, o viño novo que sae das adegas a finais de novembro celébrase ben. Obviamente, os adegueiros tentan entusiasmar para colocar os primeiros lotes da anada no mercado, pero no frío final de outono e inverno, o viño novo sempre se recibe de bo talante. A min gústame moito toda esta historia de ver unha anada aínda en plan bebé, dando os seus matices olorosos e saborosos máis candidos, máis florais e máis directos. Este é un viño que eu teño asociado ao frío. A bebelo con luvas e pucha, nalgunha esquina de Saint-Germain, por exemplo, con esas notas case de piruleta. Este domingo bebímolo confortablemente, acompañado duns níscalos de Figueirido e uns boleti do Castro Lupario, que contiñan en si mesmos toda a alegría dos deberes e das urxencias que por fin estamos rematando. O viño novo é, para min, ás veces, o inicio do ano novo.
A Concha Valladares (Ultramarinos Valladares, en Compostela), polo que me dixo hoxe á mañá, quedáballe só unha caixa de Beaujolais Nouveau Domaine Piron, de Corcelles. Está estupendo. A 7,80 euros a botella.
Nas Mariñas temos a celebración do “Viño de Castañas” que ven sendo este viño novo, ou aínda pouco feito, cando os pipotes se abren antes de tempo para festexar, nestas datas coas castañas.
Hola Manuel.
En Arantei (Salvaterra do Miño) celebrouse fai uns días a XIII Festa do Viño Novo de Arantei. Merece a pena ir e probar este viño da zona do Condado.
Saudos.
Tradicionalmente era o magosto a festa do viño novo e do queixo, xunto obviamente coas castañas.
E según se foron perdendo os magostos e certas actividads da vendimia pois arrastrou ao viño xove.
Fagamos mellores magostos e recuperemos a festa tradicional.
Concordo con Xelmírez e os demais. O magosto é tamén a festa do viño novo. Había que deixarse de ghaloghuín e de samaín e de visteocarpín. “Polo San Martiño, come castañas con viño”, ou dito con música:
Castañas asadas
e viño con mel;
e a miña señora
detrás do tonel.