Búscanse voluntarios para resolver un enigma

Se lembrades, en maio visitamos un curioso lugar do concello de Coirós chamado Pena Furada. Fixémolo co seu descubridor aló nos 80, o arqueólogo Antón Malde. O sitio chamounos moito a atención: un penedento outeiro co gravado dunha moura ensinando abertamente o seu sexo, aliñada perfectamente contra o solpor. E non era o único que había no outeiro: estrados polo resto das pedras, había numerosas pedras traballadas. O caso é que neste sitio arqueolóxico de Pena Furada hai un interesante enigma: que raios é isto? É algunha sorte de santuario castrexo ou galaicorromano? É unha fortaleza medieval? É un gravado medieval, ao estilo das Sheela-na-gig tan propias das Illas Británicas? Ou é todo a un tempo? É a moura un signo sagrado ou un bo traballo pornográfico dun vixía ou un pastor aburrido hai séculos?

Para tentar averiguar máis sobre este lugar, Antón Malde e máis eu promovemos unha iniciativa de voluntariado apoiada polo Concello de Coirós e autorizada, obviamente, pola Dirección Xeral de Patrimonio. Trátase de limpar o lugar, documentalo e analizalo ben, limpar os visgos das pedras e documentalo todo, confiando en que iso nos permita determinar mellor a funcionalidade deste misterioso lugar. O Concello de Coirós encargarase de todo o traballo duro (a roza, a tala, a limpeza arbustiva) e os voluntarios do traballo fino (visgos, carrizos, pedras, medicións, etc.). O traballo será nas dúas últimas semanas de setembro deste ano e se te queres apuntar ao traballo -sinxelo pero de gran importancia arqueolóxica- podes facelo en napenafurada@gmail.com. Consulta o web oficial do sitio arqueolóxico de Pena Furada para ter, en setembro, máis información do asunto. Agora tocan vacacións.

No vídeo, Antón Malde explícache as principais características do sitio arqueolóxico.