A Penela: cociña caseira de calidade en Betanzos

Carne asada na Penela.

Quen me coñeza sabe da miña febleza pola que me parece unha das máis fermosas cidades galegas: Betanzos. De Betanzos atráenme moitas cousas, pero a penas tivera a oportunidade de xantar en Betanzos. Un só comeza a ser algo dun sitio cando durme ou come nel.

Antón Malde levounos á Penela, un dos locais clásicos de Betanzos [T: 981 773 127/ localización], na praza principal da vila. Estabamos cansos de toda unha tarde de paseos arqueolóxicos e desfrutaramos duns estupendos gintonics tamén nun recanto da Praza do Campo; coa axuda da Hendrick’s, imaxinei que un día verei voar ese globo de Betanzos que é como unha chamada a eses tempos únicos do XVIII, XIX e principios do XX que tanto perviven nesta vila e que tan ben representou no seu momento As Leis de Celavella. Na Penela, hai que probar a tortilla, por suposto, nun estilo betanceiro, grosa, e xugosa sen estar líquida no seu interior (dígoo para os que teñen aprensión ao ovo crú), a carne asada tamén é famosa, e ten xustificación (eu son un radical da carne asada, e esta está perfecta, coas patacas que se lle agardan a un prato tradicional de Betanzos), os mexilóns recheos (un punto) e o leite fritido (non é o mellor que teño tomado, pero tamén nunha excelente elaboración).

Cunhas botellas de 1906, a historia nos saiu para tres en 42 euros total (unha ración de cada), así que moi razoable. Un sitio máis que recomendable se ides dar unha volta por Betanzos.