O produto local triunfa no certame de tapas de Ribadeo

Last updated on 1 / Xuño/ 2010

Nesta edición 2010 de Ribadeo de Tapeo o palmarés xa o conta todo por el mesmo: mellor tapa, a Sopa de verdina de Lourenzá en zamburiñas de La Solana, que é a que aparece nesta primeira foto. Mellor tapa tradicional, as fabas con callos do bar A Ribeira. Como tapa máis creativa, a tosta de queixo, confitura de tomate e pemento de O Cantón e dúas mencións especiais: polo esforzo de recuperación dunha receita tradicional ribadense, o pato ao estilo de Ribadeo da taberna El Cabás, e polo elegante deseño do prato, os ravioli de centolo do restaurante da Confraría de Rinlo.

Produto local, elaboración local e reivindicación do que é propio; nestes pratos, que coidan a súa presentación de xeito escrupuloso, demostran que apostando por elaboracións sinxelas, preocupadas pola calidade e vinculadas á cultura gastronómica local o éxito de xurados e públicos está garantido.

Tiven a honra de participar como xurado desta edición, e iso supuxo un maratoniano día enteiro entregado á arte de probar tapas dunha banda a outra do concello ribadense, con só dúas horas de descanso intermedias. Afortunadamente, o moi bo nivel xeral do tapeo en Ribadeo facilitou as cousas; as elaboracións eran máis ou menos lixeiras e ben cociñadas e as proporcións das tapas -todas a un euro- tiñan dimensións máis que razoables. 49 locais implicados no proxecto de ofrecer tapas especiais é un número magnífico (Santiago ten 60 locais no Santiago(é)Tapas, se ben na capital os establecementos adoitan ofrecer máis dunha tapa).

Aquí vai unha galería de fotos coas gañadoras e con outras tapas que probamos, para que poidades ver o nivel.

Mellor tapa tradicional: fabas con callos

Mellor tapa creativa: tosta de queixo, confitura de tomate e pemento