Coas nosas mans, Premio Nacional de Periodismo Álvaro Cunqueiro á mellor web gastronómica

“Esta é a miña máquina”, unha das historias de Coas Nosas Mans. Podes vela aquí.

Estamos que nos saímos. Coas Nosas Mans, o sitio web que realizamos desde o Grupo de Novos Medios da USC, cun equipo integrado por alumnos das titulacións de Xornalismo e Comunicación Audiovisual dirixidos polos profesores Xavier Vaz e eu mesmo para o Fórum Gastronómico, acaba de gañar o áccesit a mellor web gastronómica no XV Premio Nacional de Periodismo Gastronómico Álvaro Cunqueiro que convoca o concello de Lalín. O proxecto foi realizado co apoio da Fundación Dieta Atlántica da Universidade de Santiago e o Fórum Gastronómico de Santiago.

Coas nosas mans é unha gran reportaxe multimedia sobre o pasado, o presente e o futuro do cerne da nosa gastronomía: os alimentos. Cos alumnos, percorremos moitos quilómetros retratando aos produtores e transformadores dos alimentos do noso país, amosando a íntima relación da nosa cultura coa orixe natural dos nosos mellores produtos alimentarios.

Quero darlle as grazas a Eloi, Rocío, Vanesa, Silvia, Mónica, Elena, Andreia, David, Eloy, Jabi, Juan, Roy, Samuel, Víctor, a Xosé Cannas, a Sole, a Xabi Vaz, a Pep Palau e Jaume Von Arendt, a Turismo de Santiago, á Facultade de CC. da Comunicación e a todos os patrocinadores do proxecto por crer en nós, por todas as horas e ilusión investidas en este proxecto, e tamén ao xurado por elexirnos como mellor web gastronómica.