Santo Estevo de Ribas de Sil

O mosteiro está localizado nun alto sobre o canón do río Sil

Cando tentei visitar o mosteiro de Santo Estevo de Ribas do Sil, estaba no medio do intenso proceso de restauración que consolidou e modernizou o mosteiro. Agora, aproveitando o bo tempo, fumos visitar os seus tres claustros.

Claustro dos Cabaleiros de Santo Estevo

Teño que dicir que o resultado engaiola e resulta impresionante. A solución de cristal para pechar o Claustro dos Cabaleiros, o mobiliario contemporáneo que aparece de súpeto entre os muros, o pasmo dos seus tres claustros de épocas e fins diferentes fan que a visita sexa unha experiencia sorprendente.

Claustro dos Abades, románico refeito no XVIII

O mosteiro é agora un luxoso Parador cun dos máis fermosos restaurantes do país, enclavado na base do mosteiro e mergullándose nun bosque frondoso de carballos e castiñeiros. Todo aquí é luminoso e misterioso ao mesmo tempo, como as inevitábeis referencias tolkinianas. Aínda que o mosteiro xa ten 1.400 anos de historia, a súa fundación máis ou menos orixinal ocorreu co retiro de nove bispos galegos a estas soedades para eremitar. Deles veneráronse ao longo dos séculos Nove Aneis que converteron ao mosteiro nun rico foco de peregrinación e espiritualidade.

Medallón na bóveda do Claustro dos Abades

Para rematar, amoso esta foto deste medallón que parece amosar a dous xemelgos bastante cabreados agarrando ¿unha corda? ¿un cordón umbilical?. Confeso as miñas limitacións na interpretación iconográfica. ¿Alguén pode aclararme que demos significan? Tamén se admiten esbardalladas…