atravesando o país

Dos máis de 2.000 metros de altitude de México D.F. descendemos ata Veracruz, na costa oriental. Cos ollos abertos, a través do cristal, aparece o México contemporáneo. Casiñas de pranta baixa, vaqueiros a cabalo, os camiños lamacentos abarrotados de campesiños de sombreiro de palla, mulleres cos bebés pendurando das pernas, peóns sentados nas ponlas das árbores, igrexas de doble campanario bicolor disimuladas no medio da chaira, promesas de política graffiteadas nos muros de cemento de comunidades arruinadas, anuncios dos concertos de narcocorridos cantados polos Tigres do Norte. Atravesamos cráteres de volcáns e enormes campos de millo que neste país é o ouro que atura un cento de millóns de vidas. Así chegamos a Veracruz, na costa oriental. A cidade foi o punto de chegada dos homes de Hernán Cortés a México, o primeiro asentamento no continente. O illote de San Juan de Olúa, hoxe devorado polo porto comercial da cidade, foi o último reduto español en México.