Fotos: Sole Felloza

Boa vida. Imos resumilo así xa para comezar. Así foi a XII Xantanza, que organizaron Xosé Manoel Ramos e Antonio Portela no Restaurante Croque [T:986 247 750 / localización] , ubicado nun lugar moi especial, basicamente espectacular: na punta de Alcabre, onde está o Museo do Mar de Vigo. Alí, neste edificio fermosamente redefinido por Aldo Rossi e posteriormente por César Portela, está, para min, a esencia plástica da modernidade vinculada ao mar en Galicia. A antiga fábrica de conservas – matadoiro atópase perfectamente integrada coa ría viguesa. A luz entra por todas partes, o azul do mar convértese na estrutura primaria de todo o edificio e a visión das Cíes converte o escenario nalgo grandioso.

Xuntámonos para celebrar a XII Xantanza. Tras unha visita guiada inicial polo Museo na que coñecimos algúns dos fondos -algúns curiosos, como a recreación dunha lonxa viguesa que estivo activa ata os 80 cun curioso contador vaporware- ata unha zona inferior que, se cadra, se tería solucionado mellor e de xeito máis barato coa edición dun folleto a cor cos contidos alí expostos. No Museo resulta especialmente chamativo, tamén, o acuario, que contén as especies das rías, e non menos divertido é asistir aos comentarios ecolóxicos dos visitantes sobre os peixes:

-Eu fago ese con chícharos.
-Pois cunha allada vai que nin diola.

Un manhattan

E chegou o momento de xantar. O que sobrancea, o que fai distinto ao Restaurante Croque, e que lle pega estupendamente, é a coctelería. Unha espectacular coctelería que te recibe e te acompaña despois do xantar. Escollimos o menú degustación, que se iniciou cun manhattan ou un dry martini, para gustos, para despois seguir co seguinte:

Coca de millo con sardiñas, tomate confitado e flor de estrela

Ravioli de remolacha recheo de txangurro e aceite de cilantro

Cigala con sopa de hervellas

Pescada con menestra (se cadra o máis frouxo do menú)

Láminas de vaca, salsa de foie e aceite de melanosporum (trufa) (espectacular)

Crema de iogur con limón e chocolate amarco con menta e tomillo limón

Un menú moi aceptable, con algúns puntos baixos (a pescada) e outros impresionantes (o lombo de vaca), que acompañamos con Casal de Paula 09 (Ribeiro) e VX. A sesión rematou con coctelería na estupenda terraza do local, sobre o mar, escollendo entre o silver fizz, a mula moscovita, a caipiroska ou o whisky sour. Pareceume fantástico: a coctelería é a artesanía dos bares. Cada copa leva un traballo e unha preparación, un saber facer absolutamente meritorio. É reivindicar para a bebida a atención que se lle presta ao xantar. Cos nosos bares convertidos basicamente en abrevadoiros de alcol de baixa calidade, a alta coctelería é unha práctica en perigo de desaparición no noso país que hai que agradecer.

Caipiroskas en preparación

Unha caipiroska

Por certo, para quen lle interese. Esa mesa para dous no alto do restaurante, que ve toda a saída da ría de Vigo enfronte súa, debe ser absolutamente espectacular. Rematamos a tarde noutro chiringuito de praia, co sol poñéndose e ese estilo tan vigués de deixar pasar as horas ao carón do mar.

P.D. Quitando a foto tamén estaba Carmen Albo, que participou connosco nesta XII Xantanza. Grazas!

Unha xantanza absolutamente veraneira. E a preparar o vindeiro evento, que xa está aquí ao lado!