Cinco pratos para o restaurante Pandemonium en Cambados

Last updated on 18 / Xaneiro/ 2009


Arroz de berberechos con codium. Fotos: Sole

O cociñeiro Antonio Botana rexenta o restaurante Pandemonium [T: 986 543 638 / localización] en Cambados. Próximo ao Yayo Daporta (Botana e Yayo pásanse ingredientes entre eles coma os veciños dos pisos sal entre nós), o Pandemonium é un restaurante cun forte acento nos produtos do mar. A xeito de carta de presentación, neste ano Botana tentou demostrar as posibilidades do polbo e, en xeral, dos cefalópodos. O que máis me impresionou do Pandemonium é o competitivo prezo do seu menú degustación (36 euros no 2008), que nos fai pensar nas piruetas creativas que deben facer os cociñeiros para manter unha aposta contemporánea a un prezo competitivo nunha zona na que o turista demanda, moitas veces, un restaurante máis convencional de peixe e marisco. Sei que non é doado manter con dignidade determinadas apostas culinarias como estas no día a día.

Estes cinco pratos do seu menú degustación -hai tamén, obviamente, postres e outros entrantes- que publicamos son a vértebra da destreza do cociñeiro en axustar prezos, receitas, produtos sinxelos e económicos e tempo, equilibra como pode e ensalza o tránsito festivo que supón un xantar degustación de dúas horas e pico. Xunto con ese arroz de excelentes berberechos de Noia con codium (un alga que lle achega un intenso sabor mariño a este arroz), están as luras da ría con tomate confitado e pistacho, a dourada cun mallo de herbas, o xarrete con setas. Este rico ovo con patacas fritidas e chourizo, preparado para que a xema sexa unha festa de textura. Hai pratos que se comprenden mellor coa imaxe en movemento:

Con viño e cafés (nós tomamos un albariño Contra a Parede 2004), o Pandemonium sae arredor dos 50 euros.

2 Comments

  1. 16 / Xaneiro/ 2009

    deus! que fome e termino de comer…!!!
    beijos

  2. 16 / Xaneiro/ 2009

    Pois antes era do mozo dunha amiga (supoño que o seguira sendo)…e incluso chegara a facerlle a mascotiña que logo so quedou para cousas dos cativos…algún día ei ir por alí :) Saúdos e apertas

Deixa unha resposta

O teu enderezo electrónico non se publicará