Portada do libro (feita por Santy Gutiérrez) e fragmento de infográfico de Manuela Mariño
O venres presentouse Po de estrelas. Novas receitas científicas de Os dados do reloxeiro, escrito por Xurxo Mariño e editado pola Sección de Ciencia, Técnica e Sociedade do Consello da Cultura Galega. Po de estrelas é a continuación de Os dados do reloxeiro, a primeira edición impresa das columnas de divulgación científica que Xurxo publica en culturagalega.org. Desta volta, contamos para a edición coas ilustracións humorísticas de Santy Gutiérrez e as infografías de Manuela Mariño.
En Po de estrelas, Xurxo dá claves para comprender novas teorías e ideas sobre a natureza do Universo e a vida no planeta Terra, sempre combinando esas dúas propiedades que tan ben domina: o rigor e a precisión científica e a capacidade para entreter e divulgar. “Comprender o mundo que nos rodea é un excelente elixir mental contra a credulidade e o fanatismo“, asegura Xurxo. Po de estrelas é un fermoso libro de divulgación científica, tanto a nivel de edición como dos seus contidos, xa que ten varias direccións de lectura: Manuela Mariño, infógrafa de La Voz de Galicia, explica na contracapa, a través de dous gráficos, o nacemento e morte de estrelas coma o Sol e o ciclo do carbono e o sol, que xenera os nutrintes dos que nos alimentamos e Santy Gutiérrez crea un contrapunto humorístico en paralelo aos breves artigos divulgativos de Xurxo.
Podes descargar de balde Po de Estrelas aquí (en PDF).
Unha ilustración de Santy Gutiérrez para Po de Estrelas.
6 respostas
Hai dous anos dorfun agasalloume un exemplar do anterior libro, que repatiran de balde na XGN e agardo desfrutar igualmente deste.
Parabéns ao Consello pola iniciativa.
Tamén hai dous anos que xurxo mariño veu á nosa clase na facultade para falarnos da ciencia e de como trataba a ciencia nas súas columnas e deixounos, en xeral bastante impresionados.
A título persoal teño que recoñecer que os seus artigos enganchan, sobre todo aos que somos de letras e nós dá preguiza iso de profundizar na ciencia.
As miñas felicitacións para Xurxo!
Manolo, son Xurxo. Grazas pola entrada no teu blog. Quería agradecerche tamén aquí a túa entusiasta labor no desenvolvemento do libro, xa que moitas das ideas da súa edición son túas.
saúde
xurxo
Hola Manolo. Eu querríao mercar.
Agradecería información o respecto.
Encántame o teu blog.
Bicos
María
María, a Editorial Galaxia vai comezar en breve a facer a distribución en librarías. Alí poderás mercalo sen problemas, tanto se o teñen como solicitándoo.
Grazas, Xurxo, o pracer é meu de poder traballar nesta edición e aprender tanto contigo.
Coméntanos algo