Capítulo 0 na contraportada de A Nosa Terra

Last updated on 9 / Abril/ 2008

Levo unha semana totalmente mediática. Hoxe, na contraportada de A Nosa Terra, aparece unha entrevista “simpática” co autor deste blog, ou sexa eu, realizada por Eva Estévez. Téñolle pavor ás entrevistas simpáticas: nin son ocorrente nin teño chispa, así que afróntoas como tirándome ao baleiro e matando perdices a canonazos. De tal xeito que, cando colguei o teléfono despois de responder aos tiros a discreción de Eva, tiven a sensación de que soltara a maior sarta de barbaridades e incoherencias da miña vida. Por sorte, á redactora sobroulle maña e oficio para que a entrevista ata quedase chula. Se A Nosa Terra a publicara na edición dixital, actualizarei este post coa ligazón. Así que, moitas grazas!

E unha impresión moi persoal: cando paso por tempadas moi mediáticas, a sensación ao final, moi curiosa, é de que me quedo en coiros, psicolóxicamente falando. Para volver escribir no blog, cómpre esquecerse do anterior, como se nada tivera acontecido.

Actualización: xa está colgada, en PDF. Podes descargar o número completo aquí (a entrevista está na última páxina).