Como clausura da excelente exposición sobre os deseños de portada de Xohán Ledo titulada «As caras do libro», organizada pola Editorial Galaxia, mañá participarei en Vigo na mesa redonda Os libros de mañá. Novas tecnoloxías e novas linguaxes sobre o futuro do libro ante a perspectiva das novas tecnoloxías, que promete ser ben interesante: debido ao momento especialmente vibrante que vivimos co xurdimento de novas interfaces, novas tecnoloxías e a xeneralización do uso de Internet en boa parte dos ámbitos da produción cultural.

Participarán Óscar Sánchez (aka Pawley), ben coñecido no blogomillo polo seu blog Días estranhos, o escritor Francisco Castro -recentemente fichado por Galaxia para encargarse dos proxectos dixitais da empresa-, a escritora e xornalista Rosa Aneiros e a xornalista María Yáñez. Eu farei un esforzo e dedicareime a moderar. ;-)

A mesa redonda celébrase o mércores 23 de xaneiro, ás 19.30 horas, no Auditorio da Fundación Caixa Galicia (Policarpo Sanz, 21, Vigo). Se te apetece pasar por alí, será un pracer que te unas á conversa e poder saudarte en persoa.