Onde mercar bo viño en Santiago

Agora que chega o Nadal, multiplícanse as celebracións entre amigos, familiares e compañeiros de traballo. Pode que precises levar unha boa botella de viño a algures. Aquí van algunhas recomendacións de onde atopar marcas interesantes en Santiago de Compostela. Por suposto, isto non é exhaustivo, pero nestes lugares localizarás unha selección escollida, entendida e pensada, de viños. Curiosamente, esta cidade, que debe ser das máis consumidoras do país, conta con moi poucas tendas especializadas na cultura do viño. Aquí bébese o viño sobre todo en espazos públicos, á carta, en restaurantes, bares e tabernas, en cuadrilla. Esta guía, por suposto, é tan arbitraria coma todo o resto do sector. Así que non dubides en engadir sitios que coñezas ti.

Viñoteca O’Beiro (Raíña, 13).
A viñoteca O’Beiro foi un establecemento pioneiro en Santiago. Xunto ao tapeo típico desta rúa da cidade vella en ambiente enxebre de madeira e pedra ao aire, O’Beiro ofreceu desde o principio unha enorme carta de referencias enolóxicas galegas. Aínda hoxe segue sendo, posiblemente, a tenda con máis variedade de viños e licores de Galicia e algúns outros produtos da terra. Sempre que vén algún amigo estranxeiro mándoo alí a coller viños galegos. Os prezos, algo caros.

O Almirez (Doutor Teixeiro, 34)
É moi posíbel que ese viño que escoitaches mencionar por terceira ou cuarta vez en conversas con persoas diferentes, ou que viches recomendado nun suplemento de xornal, ou que gañou algún premio ou mención en revista especializada, só o atopes en Santiago no Almirez. O Almirez é unha tenda gourmet con empregadas que falan a susurros e tratan aos sandwiches como bebés. E, no fondo, está o andel dos viños. Unha especie de colección de tendencias e modas do mundo do viño. Están todos os mellor puntuados. Os máis mencionados polos críticos e máis buscados polos sumilleres. É o reino dos vinte euros. Ti decides entrar ou non. A min dáme un pouco de repelús, pero recoñézolle a valía (en todos os sentidos).

Valladares (República do Salvador, 14)
A miña tenda de viños preferida en Santiago. Valladares é un ultramarinos de toda a vida que pouco a pouco se foi reconvertendo ao negocio do viño. Un atopa aquí unha gran selección de viños galegos, pero tamén Riberas, Riojas e dunha gran diversidade de denominacións españolas. Entre as caixas hai auténticas xoias, nomes que soan, lanzamentos novidosos e opcións consolidadas, todo a prezos sensatos. Conchita Valladares, a propietaria, de sonoro acento local, é un crack do negocio. Controla as diferencias, os matices, sabe aconsellar, pídeche referencias para traer cousas novas. Cando hai algunha dúbida na discusión, acude a unha manoseada Guía Peñín para orientarse. Se che gusta o viño e vas mercar unha botella, seguro que saes con tres.

Las añadas del siglo (ao principio de Fernando III o Santo)
Prometía ser a primeira enoteca “integral” de Santiago, cunha enorme lista de referencias, un club de viños e unha serie de actividades de cata destinadas a crear masa crítica, esta franquicia sempre parece estar ao borde do que Anthony Bourdain chama o Síndrome do Restaurante en Decadencia. Ante a perspectiva da creba, o restaurante cambia continuamente de menú, redefine os espazos, cando un entra sempre ten a sensación de estar na angustiosa soidade dunha cripta…algo similar pasa en Las añadas del siglo desde hai tempo, pero sobrevive e parece ir tirando -do cal me alegro moito. Las Añadas é a enoteca máis extensa da cidade, e conta cunha colección –no seu momento máis ampla que a actual- algo irregular pero extensa de marcas. Ademais, é das poucas tendas de Santiago con andel de viños internacionais. Paga a pena darse un paseo por alí (e baixar á parte de abaixo, porque arriba só están os viños premium en plan Vega Sicilia e matan do susto)

Hipercor
Poño aquí El Corte Inglés porque é un caso ben complexo, porque teño a impresión de que cada área de venda de viño do hipermercado está controlada por alguén diferente. No Hipercor de Santiago hai tres áreas de viño, a saber: a macroestantería, dominada polos clásicos rioxanos de toda a vida e frangullas para o resto das denominacións. É lamentábel, por exemplo, a escaseza de viños galegos. Aínda así, hai que percorrela pacientemente porque ás veces un atopa sorpresas. Despois están os andeis do carón, que teñen viños de algunhas denominacións máis minoritarias, e onde se atopan algúns dos viños que están despuntando nestes momentos, coma os Jumilla de Casa de la Ermita. E, curiosamente, compensa subir a botarlle unha visual á cámara climatizada da sección de Delicatessen. Xunto a viños carísimos, ás veces hai outros de prezo normal que o enólogo responsábel do lugar incorporou entre as xoias da coroa. Unha estratexia moi importante no Hipercor é agardar ás Xornadas das Comunidades Autónomas. Na sección de viños sempre hai unha selección bastante curiosa das variedades rexionais a prezos baratísimos. Lembro especialmente unha xornada de Navarra, na que houbo auténticas marabillas.