Gallaeciae Monumenta Historica: unha ferramenta para explorar a Idade Media

Last updated on 16 / Xaneiro/ 2015

Con gran pracer presentamos hoxe Gallaeciae Monumenta Historica, un proxecto de repositorio documental no que no CCG estamos incorporando (e procesando) toda a documentación medieval que tiñamos editado ao longo destas décadas e no que no futuro incorporará tamén documentación externa. Esta é unha visión distinta da documentación medieval. Foi este un traballo de chineses e debo agradecer ao meus compañeiros técnicos e á dirección do CCG o entusiasmo cun proxecto de gran importancia para Galicia como país. Todo en libre acceso, consultas a texto completo e sen rexistros previos.

As documentalistas de DeHistoria realizaron un traballo inxente de comprender os documentos e unificar as numerosas heterografías (versións distintas da mesma palabra, topónimo ou nome de persoa, un problema frecuente da documentación medieval), construíndo un impresionante friso da sociedade medieval con múltiples vías de exploración de documentos en latín, galego e castelán. O sistema programado por Dimensiona permite seguir a pegada na documentación de raíñas, bispos, pero tamén cabaleiros, burgueses, xastres, labregos, explorando o noso pasado a través dun sistema hipertextual. Aos alemáns e aos portugueses levoulles moitísimas décadas completar os seus repositorios documentais, os seus Monumenta Historica. Nós esperamos acabar un pouco antes, pero esta web é un desafío e un convite a explorar lugares, persoas e conceptos ao longo do pasado.

Falta moita documentación non editada polo CCG por incorporar, pero xa hai 7000 documentos publicados que dan conta da potencia do sistema.

Probade a explorar, por exemplo, desde os índices A-Z.