Parecidos máis que razoables: Caterthun e Coto Redondo

Coincidiu que estou a preparar a miña inmediata viaxe a Escocia e, ao mesmo tempo, a charla de mañá, luns, sobre o celtismo en Galicia. Aínda que a miña aproximación non vai ser arqueolóxica, hai cousas que non me resisto a publicar, e que me provocan unha gran diversión cando as vexo. Como estes parecidos máis que razoables entre os dous castros de Caterthun, en Angus (Escocia), á esquerda, e o Castro das Hedras e o Castro Pequeno, no Coto Redondo (entre Agolada e Antas de Ulla), á dereita. Aínda que a foto non se aprecia, nos castros galaicos tamén teñen murallas concéntricas exteriores. O parecido é tal que mete medo, mesmo esa semellanza entre o castro circular (norte) e o castro en forma ovaloide (sur). Nin os escoceses nin os galegos foron estudados a fondo a nivel científico.

Iso si, por suposto que hai unha diferencia. Mirade o respecto ambiental co que están tratados os sitios arqueolóxicos escoceses e a clásica desfeita galaica: as pistas polo medio do perímetro de protección, o cortalumes, o parque eólico…fáltame o verquedoiro municipal e a canteira para ter todo o surtido contemporáneo de destrución de paisaxe galega!