The Fell Fonts: unha coidada recreación dunha tipografía do XVII

Parabéns pola nova, moi interesante dispoñer desta tipografía nas nosas computadoras.

A propósito do bispo John Fell, como xa sabes son especialista en grimorios e particularmente no Libro de San Cipriano e na figura de San Cipriano de Antioquía, o Santo Mago por excelencia da tradición católica, e hai un tema moi curioso e menos coñecido relacionado co bispo británico John Fell.

En Escandinavia existe tamén a tradición dos libros máxicos ou grimorios atribuidos a San Cipriano, escritos arredor do s. XVII , XVIII e XIX, que alí chaman Sybrianus ou Cyprianus, e polo xeral coñecidos como svarteboka (libros negros). Moitas veces estaban nas mans de labregos e tamén dicían que dos sacerdotes, igual que na nosa tradición.

Alí teñen a sorte de conservar en bibliotecas, museos e coleccións particulares arredor dun cento deles, coido que por unha banda seguramente polas condicións climatolóxicas distintas da nosa, e tamén porque alí non foron perseguidos pola Inquisición e as institucións católicas imperantes.
Os publicados no s. XIX e XX son sobre todo dicionarios de soños. Eu teño media ducia deles, do s. XIX ata 1953.

Curiosamente algún destes Cyprianus, como os Black Books of Elverum , están atribuidos no seu título ao Bispo de Londres John Sell, co ano 1667, referíndose realmente ao citado Bispo británico John Fell. Esta atribución é evidentemente un xeito de darlle prestixio e validez ao texto.

É certo que John Fell escribiu un tratado titulado Cyprianus, pero non é un libro de maxia senón unha recopilación comentada das obras de San Cipriano, o Bispo de Cartago, co que é de cotío confundido San Cipriano de Antioquía.

Teño na colección un exemplar da dita obra “Cypriani, Opera Recognita & Illustrata Joanne Fello” publicado en Amsterdam no 1700, de gran tamaño e con máis de catrocentas páxinas.
O meu exemplar é coma este
http://www.europeana.eu/portal/record/9200110/2D538E23A6C54C72B396AF22B82887419B599A79.html

Apertas,
Félix Castro