The Newsroom vs The Hour

Last updated on 19 / Xaneiro/ 2013


Elenco de The Newsroom


Elenco principal de The Hour

Un compañeiro meu de traballo, Xermán Hermida, ten a teoría -creo que atinada- de que se fan centros de interpretación sempre de actividades ou lugares que xa morreron realmente. Se cadra coas series de TV, hoxendía, pase exactamente o mesmo. Están The Newsroom (americana, de HBO) y The Hour (británica, da BBC). Ambas as dúas retratan épocas supostamente douradas da televisión, a época dos grandes informativos. Aínda que hai diferencias cronolóxicas (The Newsroom ambiéntase no mundo contemporáneo, xusto agora e The Hour recrea os primeiros magazines informativos semanais dos anos 50), creo que é factible comparar as dúas series.

Máis alá dos tópicos, as dúas series son moi semellantes na súa estrutura. Combinan tramas persoais e sentimentais cunha gran historia xornalística que enfía a historia e conduce a apoteose final de cada capítulo, que é a emisión en directo do programa. Ambas as dúas susténtanse na báscula entre presentador/es carismático/s e produtoras efectivas e atribuladas, en diferentes grados de soltería ou relación sentimental con outro protagonista. Pero a partir de aí sucédense desenvolvementos notoriamente distintos, e isto é o máis fascinante, para min, destas ficcións contemporáneas.

A visión de The Newsroom, un informativo vespertino dentro dunha gran cadea norteamericana, acada visións épicas e personaxes relativamente polarizadas. A relación entre os dous protagonistas é necesariamente complexa, por iso se lles construíu un pasado. Pero o seu pasado é case inocuo. As personaxes de The Hour, pola contra, teñen un pasado considerablemente turbio. En The Newsroom as personaxes padecen arrebatos heroicos que os subliman e os afastan do cotián, a través de actos nobles que acadan a súa gloria nos trinta minutos de emisión. En The Hour os defectos, os medos, as inconsistencias das personaxes acabánse desvelando, aumentadas, á sombra do alcol das noites en locais ou en tremendas soedades. Ambas as dúas series tentan recrear a paixón dos profesionais do xornalismo pola historia que vai ser contada nun día e case esquencida o día seguinte; pero mentres en The Newsroom o trasfondo final é a rectitude moral e a amplitude humana dos que toman a decisión de informar -tremendamente inocente, irreal se cadra-, en The Hour nada disto se evidencia; os discursos non son necesarios, as mostras de heroísmo tampouco. Cada quen carga coa súa culpabilidade, desempeña o seu oficio case como un destino inevitable. Ocorren no trasfondo, nunha corrente subterránea que, ao final, ao meu ver, aparece máis consistente sen a penas ser evidenciada.

Un non pode deixar de pensar que, malia que as dúas series son producidas ao mesmo tempo, unha e outra representan, en efecto, épocas distintas. En The Hour o xornalismo non se formulaba, facíase. En The Newsroom, as personaxes parecen reafirmarse continuamente, como sabendo que aquelo que pretenden ser se cadra deixou de selo hai moito tempo.

Be First to Comment

Deixa unha resposta

O teu enderezo electrónico non se publicará