Xa estamos a nada do inicio do Fórum Gastronómico de Santiago e os colaboradores andamos a mil. Estamos ultimando xa os preparativos para dúas actividades moi especiais que se prepararán o domingo 26. Trátase de dous obradoiros do ciclo Science&Cook, que promoveu a Universidade de Vigo nos seus campus e que agora chegan a Santiago, reunindo en charlas didácticas e interactivas a científicos universitarios e cociñeiros que revelan técnicas de avangarda e os procesos químicos, físicos e tecnolóxicos que desembocan nos sabores, nas texturas e nas técnicas culinarias. O domingo teremos dous Science&Cook moi chulos.

Bea Sotelo (A Estación, Cambre), Marta Domínguez (Universidade de Vigo) e Susana Álvarez (Universidade de Vigo)
Science & Cook. Frío por fóra, cremoso por dentro: aplicación do nitróxeno líquido na cociña.
A vital Bea Sotelo vai meterse co nitróxeno ata a cociña para coñecer as enormes capacidades deste gas entre os fogóns.

Concepción Pérez (Universidade de Vigo) e Gonzalo Rei (El Mercadito, Santiago)
Tomatomorfose: técnicas e estados ao redor dunha froita
Acabo de chegar de ver o que ten pensado Gonzalo Rei e é alucinante: unha viaxe de 360º ao redor dun humilde froito, o tomate. E asegúrolles que paga a pena.

Podes consultar horas no web oficial do Fórum. A cita, este domingo 26 de febreiro en Compostela.