Dous viñazos: Finca Garabato Cepas Vellas 2007 e Els Jelipins 2004

Son dous viños tan escasos como excepcionais na súa estrutura, de bandas estremas da Península Ibérica. O Finca Garabato Cepas Vellas 2007 de Adegas Vilarvin é un albariño de Crecente, no Rosal, criado nas súas propias lías e deixado un ano en depósito para que evolucione en condicións. O resultado é un viño complexo, con notas brillantes e diferentes na nariz, no ataque de boca e no posgusto, que fan disfrutar de seu; outro exemplo de como a perspectiva dos albariños criados de xeito paciente é tremenda. Unha auténtica marabilla. Vale 20 euros.

Outro pedazo viño foi un do que prometín falar trala nosa visita a Mugaritz: Els Jelipins 2004. Este é un viño moi especial. Pedinlle á sumiller de Mugaritz, Linda Milagros, dúas cousas: variedade e terroir. “Teño algo para vostedes”, contestou ela. E chegou Els Jelipins 2004. Un viño feito cunha variedade de uva chamada sumoll, unha auténtica xoia da que só se fan 1500 botellas anuais en Font-Rubí, a unha hora de Barcelona. A sumoll, desprezada durante anos ata o punto de que non está na Denominación de Orixe Penedès, orixina un viño marabilloso e profundo, de gran carácter mediterráneo (capa media, calor na boca) pero cun percorrido único e diferente. Este Jelipins é brutal. Sae a 40 euros a botella. Váleos ben, en serio. Aquí se conta a súa historia (grazas, Alfred).