Las Bodeguillas de San Roque e San Lázaro xa teñen blog
3 / April/ 2009 2 comentarios
Descubrino o outro día por casualidade: as Bodeguillas de San Roque e San Lázaro xa teñen blog. É unha estupenda noticia para os seus clientes, xa que por agora, o que están facendo, é contar a programación cultural e de actividades que teñen os locais. Quen me coñeza, sabe que son ben afeccionado á Bodeguilla de San Roque e á súa carta de viños, sen dúbida das mellores de Santiago, e tanto esta coma os platos -sempre unha garantía para un picoteo informal- dos máis equilibrados en relación calidade-prezo da cidade, así que o feito de que abriran unha canle de comunicación é unha noticia estupenda para clientes coma min. Onte pola noite estivemos falando da experiencia un cacho na de San Roque. Moitos parabéns pola iniciativa, e a darlle!
Velaí como un establecemento sen un grande local ou unha ubicación privilexiada triunfa de maneira rotunda e sostida no tempo -por riba de modas e tendencias-. Estes son os locais que lle dan calidade a unha cidade (e a un barrio). Canto traballo e bo facer non haberá detrás. Parabéns a Javier e a todo o seu equipo.
[...] e a ambas lles naceu recentemente un gromo en forma de blog. Da súa existencia decátome lendo Capítulo 0 e minutos máis tarde atopo o seu rastro nas estatísticas de Colineta. [...]