Voando a lombos de falcóns: o documental

¡E xa está! A xente de AXENA avisou hoxe de que xa se podía ver o documental Volando a lomos de halcones do que xa temos falado por aquí. O documental, de 13 minutos, pódese ver desde a plataforma Qualid de Nokia, xa que foi a multinacional finlandesa quen patrocinou, baixo a fórmula do mecenado, a realización deste documental dirixido por Xurxo Gago (o meu irmán). Volando a lomos de halcones amosa o proceso de invención dunha cámara especial que permite gravar o voo dun ave rapaz mesmo nas peores condicións, desde o propio punto de vista do animal, ubicada no seu lombo. Os falcóns poden acadar velocidades de máis de 300 quilómetros por hora, e o equipo multidisciplinar de AXENA (enxeñeiros de telecomunicacións, biólogos, cetreiros…) deseñou unha cámara de a penas 60 gramos de peso para poder resistir nesas duras condicións de voo. A diferencia con experiencias de filmación subxectiva de aves previas (esa famosa da BBC) é que transmitían o sinal por radiofrecuencia. No caso de AXENA, a filmación grávase nunha tarxeta. Permite salvar bosques, montañas, levarnos coa cámara a lugares insospeitados.

O resultado foi espectacular e satisfactorio: vemos a Serra do Barbanza e o monte da Curota directamente desde os ollos do falcón, planeando, caendo en picado, cazando! Hai momentos alucinantes, especialmente a partir do minuto 09:30, onde o falcón comeza a voar coa microcámara. Paga a pena botarlle unha ollada. E parabéns ao equipo de Axena e a Falcóns de Galicia, executores do proxecto, a Iago, a Fran, a J, a Rubén, a Alfonso…e aos meus pais por ter dado toda a loxística alimenticia e hospitalaria para levar a cabo este proxecto. :-)

4 Comments

  1. 18 / Febreiro/ 2009

    impresionante as imaxes da caza e cando planea sobre a ría. Pode supoñer un novo estándar para as cámaras subxectivas na natureza. Parabéns para o equipo.

  2. 18 / Febreiro/ 2009

    A verdade é que non sabedes o que disfrutamos cando podemos ver cousas así despois de tanto esforzo! Se vedes a uns elementos cun portatil encima do capó dun coche na serra do Barbanza dando brincos de ledicia… probablemente sexamos nós tras comprobar os resultados! Moitas gracias.

Deixa unha resposta

O teu enderezo electrónico non se publicará