Un cocido dezano no Mesón O Cruce para celebrar febreiro

Iván con cara de “a ver por onde comezo”. Fotos: Sole

Comezamos febreiro, o Mes do Cocido, estreándoo no epicentro da matanza da Galicia central. No Mesón O Cruce, de Vilatuxe, en Lalín [986782428 / localización] case todo o produto provén da propia granxa do establecemento, incluído este señor porco ou o requeixo, que se segue a facer aquí artesanalmente. Alí fumos convidados por Hermógenes e Conchita, os pais de Iván, para catar o mellor da súa terra. Uns guipuscoanos dunha mesa do fondo definían este cocido do Mesón O Cruce como unha orrggíaaa gggastronómica, e non lles faltaba razón. Veñan os grelos con torreznos, a cachucha, a tenreira, as costelas, o lacón, os garavanzos con chourizo ceboleiro e de carne, o requeixo da súa casa con mel do monte Testeiro, alí en Zobra, no Candán -impresionante, premiada este ano como mellor mel de Galicia, que xa é moito dicir-, o queixo da casa con marmelo, as cañas, filloas e orellas, o licorcafé espeso…