Esta semana, no Come e Fala da Radio Galega botámoslle un repaso a Madrid Fusión. Aínda que nos encheremos o luns e o martes de velo na tele, desta volta interesoume moito o monográfico EcoChefs que se lle dedica neste macrocongreso culinario. Os Ecochefs (que non son robots de cociña aínda que soen a iso), son un novo fenómeno global deste líquido de burbullas que é a alta gastronomía: trátase de profesionais da cociña extremadamente preocupados pola orixe orgánica e ecolóxica dos produtos cos que traballan.

Os ecochefs teiman en teren as súas propias explotacións agrarias, ou exploraren as propiedades culinarias de pouco coñecidas variedades e plantas do reino vexetal. É a gastrobotánica. Deste xeito, visitamos Aranxuez, onde coñecemos o interesantísimo traballo de Fernando del Cerro, de Casa José, que recupera a Huerta del Picotajo, un espazo agrícola deseñado con traza renacentista no XVI, e os interesantísimos experimentos vexetais de Rodrigo de la Calle. Tamén lembramos o traballo de Oriol Rovira en Sagás, Barcelona, no hoteliño rural Els Casals. Rovira definese como un payés do Século XXI e ten 350 hectáreas de explotación agraria para demostralo, coas que é quen de autoabastecer o restaurante e permitirse un auténtico luxo: ofrecer trufa da casa (en xenerosas racións) aos seus clientes. Non está mal con estes ecochefs.

Todo isto falámolo hoxe á mañá no Come e Fala da Radio Galega. Podes escoitar a emisión deste sábado aquí.