O cociñeiro Anthony Bourdain
Xa estamos case no límite para os agasallos de Reis, pero aquí van dúas recomendacións moi chulas.
Malos tragos, de Anthony Bourdain. Unha compilación acertada de textos breves que o cociñeiro neoiorquino Anthony Bourdain publicou en magazines, xornais, ou en papeis soltos tirados por aí. Quen queira disfrutar do gran lado canalla de Bourdain e da súa prosa áxil, rica e divertida, Malos tragos é unha aposta segura. Anacos biográficos, reflexións, literatura de viaxes, actualidade gastronómica todo aí metido. Diversión lectora en estado puro.
Atlas Mundial de cocina y gastronomía, de Gilles Fumey e Olivier Etcheverria. Profesores de Xeografía en universidades parisina, Fumey e Etcheverría uniron o seu método profesional coa súa paixón gastronómica para crear un atlas, unha achega á gastronomía desde os mapas. Este libro é un iniciador de conversas en potencia. Extensión do uso de cubertos, en que países se come sentado, de pé, de xeonllos e deitado, extensión dos tabús culturais, migración dos cultivos. Toda unha sorte de curiosidades que permiten interpretar o noso pequeno mundo a través do que comemos, das nosas teimas, manías, fobias e querencias. Somos o que comemos. E sobre un mapa sábese perfectamente.
Manuel Gago é xornalista e profesor universitario. 
