A primeira cara que vin en tempo real nunha videoconferencia, hai moitos anos, foi a dun finlandés con perilla moi simpático que se movía a saltos e que debía ter un poder especial, xa que conxelaba o tempo continuamente. De aquela, as videoconferencias eran máis unha ilusión tecnolóxica que unha realidade efectiva. A segunda cara que vin nunha videoconferencia foi tamén dun tipo con perilla. Non sei se el se lembrará, pero foi a Marcus Fernández, a quen coñecín primeiro a través dun espello virtual da Autoestrada Galega da Información. El estaba na Coruña, eu en Santiago no CESGA, e ambos os dous participabamos nunhas sesións informais de vida fugaz chamadas Last Fridays, nas que quedabamos a falar a xente andabamos en Internet no 2000 ou por aí. Ao comezar a sesión, non puiden deixar de lembrar a miña frustrante experiencia anterior co finés e comecei a desquiciarme só de pensar en tentar manter unha conversa a cachos. Pero non, ao pouco, aquel espello electrónico desapareceu e Marcus estaba en Santiago, na sala, connosco, conversando do máis tranquilo. A tecnoloxía de telecomunicacións cumprira a súa función principal: facerse invisíbel e deixar todo o protagonismo á comunicación interpersoal.

Uso con relativa frecuencia, e cada vez máis, as xuntanzas en liña: teñen moitos aspectos positivos se todo o mundo está relativamente concentrado na reunión. Na miña impresión, as reunións van máis ao gran e remátase antes con elas; a tecnoloxía impón certas incomodidades e aínda crea certos problemas que facilitan que a xente se impoña rematar canto antes. Xa non fan falta equipamentos millonarios, ademais. Teño traballado estupendamente con Skype Vídeo ou Skype Audio. Lembrei hoxe isto por dous motivos: o primeiro, este post de Enrique Dans e o segundo, o pouco tempo que terei no que resta de semana para actualizar este blog, xa que ando a tres mil: unha significativa parte das horas perdereinas desprazándome a sitios nos que non sería preciso estar fisicamente para facer o que teño que facer neles. Non estaría mal que esta espectacular tecnoloxía de telepresenza de Cisco se xeneralizase algo máis: