O venres tiven a oportunidade de asistir á xornada técnica do Segundo Congreso Internacional sobre viticultura de montaña e en forte pendente, que organizaba a Consellería de Medio Rural e o Cervim en Monforte de Lemos, e do que xa contarei máis o luns. Na xornada técnica puidemos ver como se realiza esa viticultura heroica da Ribeira Sacra, en pendentes de forte desnivel ubicadas na actualidade na ladeira norte -luguesa- do Canón do Río Sil. A moitos dos viñedos só se chega desde o río, así que parte da xornada foi a bordo do catamarán que percorre 25 quilómetros de canóns entre o embarcadoiro de Doade e o embalse dos Peares. Cunha concorrencia nomeadamente estranxeira, era espectacular ver as caras de sorpresa destes expertos en viño de Portugal, Italia, Francia ou mesmo Sudáfrica ao ver as condicións nas que os viticultures da zona obteñen o seu prezado mencía. Un dábase conta do enorme potencial turístico da zona, que é quen de sorprender e deixar coa boca aberta a visitantes especializados. Aí está aínda o secreto do noso turismo.
A viaxe de hora e media polo Canón do Sil é, basicamente, espectacular. Escarpadas ladeiras, aves rapaces, desembocadoras vizosas de ríos, fervenzas, o campanario do mosteiro de Santa Cristina no medio do bosque, dondos outeiros coroados por cipreses de aire toscano na banda ourensana…Quixen compartir algo da viaxe convosco neste vídeo que grabei:
Esperando pola túa opinión
Aínda non hai comentarios. Pero podes iniciar a conversa empregando o formulario de abaixo.
Coméntanos algo