Deseño líquido ou deseño absoluto?

Txuma Campo e Antonio Pasagall.

Boa parte dos cibermedios ampliaron a superficie horizontal das súas páxinas de inicio nos últimos tempos, adaptándoas á resolución maioritaria de 1024×768 píxeles. Esta decisión, tomada en cadena nos últimos redeseños ao longo do mundo, segue a ser controvertida. ¿Gañar espazo para o cibermedio debe valer para colocar máis información en pantalla ou para alixeirar e aclarar a existente? Como afirmou Txuma Campos, xefe de deseño de Marca.com, un 10% dos usuarios aínda manteñen a súa resolución máis baixa, a de 800×600. E sinalou un dato interesante:

-O tema non é a transición cara os 1024 píxeles de ancho das páxinas de inicio. O tema de verdade é o deseño líquido. O deseño adaptábel a todas as superficies. Iso é un reto para o deseño de cibermedios. Porque nós concebimos superficies controladas, cun ancho de liña determinado que, por exemplo, facilita a lectura. Pero un deseño líquido significa que debe existir un xeito de ver o noso cibermedio con independencia do dispositivo.

Antonio Pasagall explicou o redeseño de elpais.com. “A diferencia dos medios de prensa”, explicou Pasagall, “en Internet podes facer redeseños parciais. Temos El País redeseñado ao 40%”. Pasagall rebaixou a importancia das novas tecnoloxías ajax no seu uso en medios. “Tiñamos máis elementos ajax ao principio pero os usuarios consideran que son pouco usábeis”.