Créase a Rede do Patrimonio Cultural

Queremos que este sábado sexa un día moi importante para o patrimonio cultural galego. Desde hai moitos anos, sabemos que en Galicia temos unha paradoxa: cóntase con entidades civís moi activas na defensa do patrimonio cultural da súa localidade ou comarca, pero carecemos dunha ferramenta de coordinación que permita unir a estas entidades entre si para compartir información, intercambiar coñecemento e emprender campañas conxuntas que beneficien a todos aqueles interesados. Internet nos últimos anos foi permitindo que se estreitaran lazos entre moitas entidades, que xa comezaron informalmente a realizar este traballo. O que estamos facendo é dar un paso adiante. Un paso, no meu punto de vista, moi importante.

O día 3 de xuño, ás 11 da mañá, no Salón de Actos do Museo do Pobo Galego, celebraremos unha xuntanza aberta para a constitución da Rede do Patrimonio Cultural. Un instrumento sinxelo e flexible que permitirá ás asociacións de carácter local emprender accións conxuntas en defensa do patrimonio cultural en ámbitos que rebasan o seu territorio, nomeadamente o autonómico. Esta xuntanza está convocada por un grupo de entidades que nos puxemos de acordo para facer esta coordinación previa, pero todas as entidades civís vinculadas ao patrimonio cultural están convidadas a participar, nomeadamente asociacións/colectivos. Ollo, vir á xuntanza non compromete á nada, pero cremos que é moi importante que as entidades locais poidan contribuír a crear ferramentas que as axuden a ser máis visibles pero tamén a ser máis influíntes para conseguir cambiar as cousas. Iso si, faremos unha declaración aos medios finais declarando a súa constitución coas entidades que finalmente se adhiran.

Aquí tedes a declaración conxunta inicial, no que se explican os obxectivos da Rede e os mínimos de funcionamento que acordamos as entidades convocantes. Se queredes participar, podedes inscribirvos no formulario que está ao final da declaración, ou clickando aquí.