Tolos pola fotogrametría 3D

Os avances dos últimos anos en fotogrametría 3D son espectaculares. Aquí hai moitísimo e moi interesante por probar e comprobar, en campos moi diversos, como pode ser o do patrimonio cultural ou o arqueolóxico, onde está a ser unha revolución á hora de traballar malia que aínda non se trasladou demasiado ao gran público. Ata agora, esta fotogrametría 3D é esencialmente descritiva e documental pero temos un campo magnífico para experimentar con narrativas dixitais, con formas de explicar. Este campo, admeáis, combina excelente software privativo con outras aplicacións open source que poden substituír a opción privativa sen problema ningún.

Estou mergullado nun proceso de aprendizaxe das técnicas fotogramétricas, explorando as súas posibilidades narrativas. Por agora véxoas como un excelente complemento a outras técnicas, como a fotografía e o vídeo, e non dubido de que no futuro, se seguen avanzando deste xeito as tecnoloxías, a fotogrametría empregarase en medios de comunicación. A miña pretensión é avanzar na exploración deste campo, e considerar xa á fotogrametría como unha técnica que permite contar algunhas historias mellor, aínda que non outras.

Polo de agora quero presentarte a miña canle de Sketchfab, complementaria sen dúbida da miña canle de Youtube. Obviamente, este é un proceso de aprendizaxe en aberto e colaborativo. Hai cousas que me van saíndo mellor e outras peor. O que fago é aproveitar algunha viaxe para obter rapidamente un bosquexo en 3D, así que non lle podo dedicar o tempo que lle dedica un profesional. Pero precisamente por iso, porque son “rascuños”, poderedes apreciar a súa calidade.

Aquí vai unha selección da miña canle, ata agora especialmente volcada cara os pórticos románicos ou góticos, que te permiten explorar algunhas marabillas figurativas feitas polos nosos canteiros.

San Paio de Muradelle (Taboada). Advertide o ben que se ve a fractura do tímpano.

O impresionante pórtico de San Xiao de Moraime (Muxía), a catedral da Costa da Morte

O pórtico lateral de Moraime. Non se perdan o estupendo centauro e o abade con libro, escondido baixo o tímpano

Que dicir do marabilloso pórtico de Santiago de Cereixo, coa súa Traslatio?

ç
Sempre me encantou o estilo vintage do pórtico do Colexio de Fonseca

O bispo Maeloc non chegou a ver este pórtico de San Martiño de Mondoñedo. Gustaríalle?

Presentémoslle os nosos respectos ao Bispo/Druida Santo que creou as tormentas que derrotaron aos normandos

Alguén anímase a ler a inscrición do mosteiro de Taboada dos Freires e o seu misterioso símbolo-colmea?

Para os amantes dos deseños inmemoriais, aquí vai o pórtico de San Xiao de Campo

Ao pobre do dolmen de Abuíme cominlle un esteo, pero a todo hai que collerlle o punto.