O Rego dos Muíños, unha sorpresa na Costa Norte de Malpica

Fotos: Sole / Gago

Cando un pensa que coñece todos os puntos populares dun territorio como é a Costa da Morte, o pracer enorme é descubrir lugares novos dos que ninguén no teu círculo nunca te falara. Este é o caso do Rego dos Muíños. Estaba preparando na casa un roteiro pola costa norte de Malpica, para ver algúns elementos que me interesaban, e de súpeto distinguín un río que caía ao mar e unha chea de muíños de río que se apiñocaban na ribeira do mar. Chamoume tanto a atención que fumos ata alí.

(clicka aquí para ampliares o panorama)

O Rego dos Muíños debe ser un lugar ben coñecido na zona de Malpica. O acceso, por pista de terra, está ben sinalizado, pero leva a un enclave basicamente marabilloso, onde conflúe un dos elementos máis recurrentes da nosa arquitectura tradicional, o muíño, o pequeno muíño das zonas occidentais de Galicia que aproveita un regato de caudal medio, cun espectacular litoral aillado de cantís e furnas batentes. Cando chegas alí móveste entre estas furnas, o rego cae o mar como unha pequena fervenza e algunha destas pequenas casoupas muiñeiras parece desafiar directamente aos trebóns do mar.

Localización do Rego dos Muíños