30 de marzo: Presentamos Herdeiros pola forza

Last updated on 22 / Marzo/ 2012

Eis Herdeiros pola Forza, un ensaio escrito a catro mans polo arqueólogo Xurxo Ayán e máis eu ao longo deste ano e editado por 2.0 Editora. O libro está escrito desde a vella tradición dos libelos: axudar a transformar a realidade. Herdeiros pola Forza é un ensaio escrito desde o noso amor ao patrimonio cultural galego e a partir da experiencia persoal e profesional de cada un de nós, que somos novos pero xa non somos uns rapaces: no caso de Ayán, desde o sector da arqueoloxía profesional e, no meu, desde o de divulgador e activista cultural. A partir de textos xa publicados, pero revisados, e outros textos escritos especificamente para o libro, queremos construír unha ollada crítica sobre a relación entre a sociedade galega, os científicos, os xestores e o inmenso patrimonio cultural do país. Unha visión sincera, pero tamén chea de futuro, tentando abordar dun xeito novo temas dos que moitas veces non se fala en voz alta, e outras veces en voz demasiado alta. Máis que un libro, é unha ferramenta para o debate sobre a nosa relación co patrimonio cultural, que o reindicamos vivo, social e construído -si, construído- entre todos.

Nos vindeiros días saberás máis sobre Herdeiros pola Forza, pero agora mesmo queremos convidarte a que nos acompañes no día da súa presentación, porque será un acto moi especial. Así que reserva a túa axenda!

O venres 30 de marzo ás 20:30 horas abriremos o Antigo Colexio dos Irlandeses, ou Pazo de Ramirás, un dos recunchos descoñecidos de Santiago de Compostela, xa que non é visitable para o público xeral. A familia propietaria actual permitiu abrir as portas do Pazo para esta presentación; a eles, a Sonia e a Nur agradecémoslles as súas xestións e permisos fondamente.

Cando entres no Colexio dos Irlandeses estarás no lugar dunha das historias máis emotivas e vibrantes da vella Compostela. No ano 1601, os resistentes irlandeses caen na batalla de Kinsale contra as tropas británicas, e moitos dos nobres gaélicos combatentes expatríanse en Galicia. O bravo Red Hugh O’Donnell e o seu grupo de cabaleiros, Raymond Burke, Hugh Mostian, os fillos de O’Sullivan Beare entre outros, todos eles nobres da vella Irlanda gaélica, chegaron á Coruña como expatriados, heroes derrotados do seu país; eles foron parte dun dos episodios máis poéticos e dramáticos da historia irlandesa, The Flight of the Earls. En Compostela, Henry Mc Carthy ponse á fronte da fundación do Colexio de San Patricio en 1605, e o obxectivo primeiro era un: confiar na educación para preservar a memoria e os costumes do seu país natal entre os fillos daqueles Earls e nobles que vivían nesta terra soñando na outra. Fascínanos esta historia: a construción dun centro de cultura como xeito de preservar a memoria e a identidade en terra allea. E fascínanos a idea de patrimonio oculto, do patrimonio ausente da vida actual de Compostela, pero tras do cal hai un relato intenso, de seres humanos, de perdedores. Por iso estaremos alí.

O Colexio dos Irlandeses está na Rúa Nova de Santiago de Compostela. Aquí podes situarte:

Ver mapa máis grande

Ah, e estarás convidada/o a licor-café. ;-)