A Roda, unha “cousa” arqueolóxica en Barreiros

O depósito de A Roda. Foto: equipo arqueolóxico

Durante o proceso de construción da autoestrada do Cantábrico, entre os concellos de Barreiros e Ribadeo un “algo” arqueolóxico salvouse de miragre. No catálogo da Xunta, o “castro” da Roda estaba situado a 300 metros do trazado da autoestrada. Un último control de urxencia das obras permitiu decatarse, case de miragre, que o “castro” non estaba onde dicía o Catálogo arqueolóxico da Xunta, senón xusto no medio e medio do desmonte da autovía! Unha foto do SIXPAC documenta de xeito espectacular como a este lugar só lle faltaron días para ter desaparecido sen pena nin gloria, e podes vela no interior do post.


A muralla da Roda no medio e medio da execución das obras.

O diñeiro do asfalto pagou a escavación en área deste lugar e, miragreiramente, o ministerio desviou a autoestrada para salvar o lugar [localización, só aproximada, ollo, por culpa da deficiente representación da Mariña en Google Maps, non é posible apreciar as estradas. Se queres ir, mellor pregúntame], que agora languidece sen pena nin gloria por un concello máis preocupado por plans urbanísiticos que por cuestións culturais, e ao que se chega doadamente desde pouco despois do desvío á Praia das Catedrais. Souben do lugar grazas a un consello de Manuel Miranda, a quen lle agradezo a referencia.

A cuestión é que este é un depósito arqueolóxico rarísimo. Un foxo e un muro de pedra -cheo de xistos- envolven un pequenísimo recinto, de trinta metros de diámetro, ubicado nunha ladeira e cun valor de defensa nulo ou case nulo. Non é o único mini-castro que hai no país e en Lugo, pero creo que debe ser o primeiro escavado. E aí vén a graza. Cando o equipo o escavou -na súa totalidade- dentro atopou…nada. Ben, non nada exactamente: había anacos de tres ou catro potes de cerámica por aí ciscados, pero con dificultades para encaixalos cronoloxicamente, algúns instrumentos líticos, unha punta de frecha de seixo, unha moeda de cobre portuguesa do século XV que lle puido caer a un pastor por alí…e punto. Alí dentro, nese recinto tan ben delimitado, non había nada máis. A súa cronoloxía é unha incógnita.

Rampa de acceso orixinal. Fotos: Sole

No austero informe do director da escavación, Juan Carlos López García, pode apreciarse a intriga ante este xacemento que non se pode datar de xeito rigoroso, á luz das evidencias atopadas. Cantas sorpresas máis nos pode dar a arqueoloxía galega!

Pero voute levar ao interior de A Roda cun panorama.

[photonav id=’a_roda’ mode=’drag’ url=’http://www.manuelgago.org/blog/wp-content/uploads/panorama_a_roda.jpg’ container_width=620 photo_width=3000 container_height=366 photo_height=366]
Arrastra para ver ao redor