Mar por Dentro: Perdidos na Area (I)

Last updated on 22 / Abril/ 2010

Fíxose de rogar (fíxenme de rogar) pero xa temos aquí Mar por Dentro IV, a nosa serie -que só poderás ver en Internet- na que investigamos e filmamos a vida dos peixes e mariscos máis apreciados pola gastronomía galega, ofrecendo unha perspectiva inédita para comprender os alimentos que nos apaixonan. Como sabedes, a xente de Axena pon a filmación e Capítulo Cero poño a edición. O resultado é un documental por entregas, producido para Internet, que nos ensina a comprender a vida das especies que son tesouros da nosa gastronomía mariña.

Nesta nova entrega, creo que vos ides sorprender. E moito! Mergullámonos na noite para buscar un tipo de especie moi querida polos padais galegos e non galegos: os peixes de area: peixes saborosos que levan unha vida abraiante baixo o mar. Nesta primeira entrega, aprenderás e coñecerás máis de rodaballos, sollas e linguados. E antes tamén verás espectaculares imaxes duns crustáceos que posiblemente non teñas visto nunca, porque chegan, por millóns, das profundidades só polas noites. Todo iso en Perdidos na Area (I), a cuarta entrega de Mar por dentro que xa podes ver neste post. E aquí podes ver as anteriores.