Importante achado arqueolóxico na ampliación da estrada a Laxe

Atención: se te interesa o patrimonio e a arqueoloxía en Galicia isto é importante. As obras de ampliación da estrada AC-433 a Laxe acaban de revelar un achado fascinante. Creo que esta é a primeira vez que se ve en público.

Entrada monumental ao castro de Castrelo. Fotos: Sole

Na altura do lugar de Castrelo, na parroquia de Soesto (Laxe), os arqueólogos encargados de facer unha prospección valorativa no trazado da ampliación da estrada AC-433 acaban de localizar unha porta monumental de entrada a un xacemento castrexo da segunda Idade do Ferro [localización].

A escavación, entre varias casas da aldea, amosa un gran muro, dun ancho superior a tres metros, e unha gran entrada de carácter monumental, similares á do próximo Castro de Borneiro ou ao de Elviña, con grandes laxes que cubren o seu chan.

Laxes cubrindo o chan da entrada monumental

O ancho da muralla pode superar os 3 ou 4 metros

Na zona interior poden verse, se cadra, os inicios dun corpo de garda. Trátase dun achado moi importante, nada habitual nas escavacións do mundo castrexo en Galicia. A muralla ten un escalonado característico, que está a aparecer nas últimas escavacións da Idade do Ferro en Galicia, pero creo que deste tipo de murallas aínda se sabe pouco. Tras del, un castro cunha interesante configuración de plataformas e parapetos está acochado baixo un pinar. Pero este espazo monumental, ubicado no medio dunha aldea actual parece indicar que o xacemento de Castrelo é especialmente valioso. E, sen dúbida, é un dos achados máis relevantes desta campaña arqueolóxica de verán en Galicia. Non puiden falar cos arqueólogos, xa que fun en fin de semana, pero sería interesante coñecer que atoparon nestas ruínas.

Porta tapiada (coloreada dixitalmente)

Posible porta tapiada ou derrube (coloreada dixitalmente)

Pero hai máis: o achado complétase cun intrigante detalle curioso que, cando menos, se produce nunha ocasión nesta escavación. Ao carón da entrada monumental, á súa esquerda, advírtese unha segunda porta, pero tapiada. Na foto está coloreada dixitalmente para que a poidas apreciar. E uns metros máis ao norte, como ves nestoutra foto, tamén podería haber outra porta tapiada. ¿Por que? Un misterio. Trátase de algo rarísimo, excepcional, no mundo dos castros.

E agora vén o tomate. Resulta que isto está no medio do paso da ampliación da estrada comarcal. Unha estrada que xa están a construír e para a que están a levantar o monte próximo. Aínda que a Consellería de Cultura asegurou a La Voz de Galicia que o trazado da estrada non vai pasar por aí (aínda que foron os veciños os que deron o aviso), que queredes que vos diga. Se un está alí pode ver como a liña da estrada pasa en liña recta desde os desmontes do norte, tumbando a entrada monumental do castro e seguindo para a aldea da Torre, porque do contrario ou tira algunhas casas da aldea ou dá unha volta do demo. Espero estar confundido na miña suspicacia. Se así é, e como se comprometeu Patrimonio, os restos fican protexidos, benvido sexa.

Eu, polo de contado, acábolle de mandar unha ligazón deste post a varios medios e ao concello de Laxe porque, agás que eu me trabuque, aínda non se publicou información de tan importante descubrimento e é unha mágoa que unha escavación, uns resultados e unhas obras que custaron tanto diñeiro público non sexan coñecidos polos cidadáns que as pagaron. Eu recomendaría que pasarades por aí con rapidez, non vaia ser o demo. Aquí está a [localización]. Respectade a área de escavación, se ides.