O viño entra nunha revolución social

Last updated on 31 / Xullo/ 2009

Moita atención a como se está poñendo o viño da rede. Non hai ningún produto da industria agroalimentaria, a escala global, que estea a construír, desde diferentes puntos e de xeito sincronizado, toda unha serie de estruturas conversacionais e sociais ao redor del dunha dimensión similar. E non falamos só de blogs. Falamos de tendas electrónicas moi desenvolvidas, cun amplo stock, que se benefician da valoración social. Falamos de comunidades de cata e de valoración por parte de afeccionados, widgets de valoración, etc. Como xa temos observados noutros ámbitos da Internet social, este fenómeno -aínda con matices locais- estase a producir de forma sincrónica a escala global e local. As grandes aplicacións norteamericanas teñen unha correlación -habitualmente máis modesta- en proxetos e startups baseadas no fluxo social ao redor do viño en España. A rede social, por suposto, é o termo de moda. No Estado, como comunidades, temos yvinos, ecatas, vinogusto, descorchados, Lo Catamos, quevino.com ou mesmo vinogallego.com , entre outras, contando ademáis coa máis influínte de todas no Estado, verema. Iniciativas creadas de forma paralela ao enorme xurdimento destas ofertas nos Estados Unidos: Adegga, Cellar Tracker, Cork’d, Snooth, Vincellar ou Winelog. As norteamericanas son moito máis diversas: mentres as españolas céntranse na conversa e na puntuación, entre as que menciono dos Estados Unidos hai unha diversidade funcional e un uso máis creativo da tecnoloxía. Alén das redes sociais de conversa, nas norteamericanas vemos sistemas en liña de catalogación da túa adega caseira ou comunidades de compras a partir da valoración social previa, ao estilo Amazon. En xeral, aí é onde podemos albiscar en que se poden converter as comunidades de consumidores nun futuro inmediato: pásase da conversa como único alimento do sitio a un sistema organizado de aproveitamento da intelixencia colectiva para axudarte na toma de decisións (de compra, neste caso). Acaba de presentarse un interesante estudo We are here! The state of Wine Industry Social Media , unha referencia básica para todos os adegueiros que queiran coñecer máis sobre o mundo dos consumidores de viño nos Estados Unidos. No caso galego, é unha teima recorrente no último ano de moitos empresarios e xerentes que buscan abrir mercado nalgúns Estados norteamericanos. Aquí se pode baixar en PDF.

Creo que hai moitos factores derivados do propio produto para entender este tremendo boom do viño. En primeiro lugar, a abundancia de marcas e, á vez, o popularizadísimo que está o seu método de catalogación (anadas, DO’s), co cal xa existe unha linguaxe establecida para organizar miles de marcas. En segundo lugar, a valoración por puntos popularizada por varios críticos gastronómicos nas últimas décadas, e que callou fondo -pola súa sinxeleza- entre moitos afeccionados; iso permite sistemas de valoración. E, en terceiro punto, unha significativa parte da afección ao viño baséase na noción de descubrimento e, por suposto, a de comunicar o descubrimento. Internet é coma un regueiro de pólvora para os enópatas. O que aconteza con el no mundo do consumidor global e 2.0 pode dar a clave para comprender outros procesos da socialización dixital da alimentación e o consumo.

En todo caso, a maior parte dos proxectos de redes sociais de viño dependerán da masa crítica e faladora que consiga reunir detrás para poder sobrevivir, xa que carecen dunha infraestrutura humana que provea de contidos de calidade, en moitos casos. Ao que levo visto, en moitos dos exemplos citados no Estado español, o problema é as cifras de usuarios, moi limitadas. Moitos aínda non conseguiron reunir a moitos afeccionados da comunidade. Seguramente, nos vindeiros dous anos, as dúas ou tres máis dinámicas conseguirán liderar o sector.