Panorámica dunha das áreas expositivas. Foto: Fórum Gastronómico.
Girona é unha cidade de gourmets. Nalgún colmado da cidade vella un atópase de repente un Petrus de cento e pico anos no escaparate, ou nun bistró rematan a cea sacando un impresionante Dr. Burklin-Wolf do 1998 coma se nada. O Fórum Gastronómico desta cidade é, nesta edición, moitísimo máis grande que o anterior de Santiago -aínda que Santiago multiplicará o seu espazo expositivo levando a Feira a Amio no 2010-. Pero este ateigamento de xente, este bulir, é espectacular nos momentos de delicada situación económica na que nos atopamos. Pregúntolle a Pep Palau, codirector do Fórum, como está a afectar a crise. “Medramos”, asegura, “pero non foi doado. Houbo que traballar moito para convencer”. Ver unha feira deste calibre, dedicada á exaltación da gastronomía como feito cultural ou económico, con esta enorme vitalidade malia as negras perspectivas económicas que se anuncian para o 2009 ou 2010 resulta intrigante, e fai pensar en cal debe ser a actitude das empresas do sector ante a crise: replegarse cautamente ou optar por unha estratexia de visibilidade, agora que todo se mira con cautela. Falo con algúns expositores. “Eu non vou esperar quieto”, asegúrame un.
One Comment