A Casa do Romualdo: unha boa base para explorar o norte da Ribeira Sacra

Antiga eira da Casa Romualdo co retablo á dereita. Fotos: Sole

Encántame a arte popular dos canteiros de Chantada e da Galicia central. Un atopa neles unha prodixiosa continuidade en dous mil anos de escultura popular, entre a cara do Guerreiro castrexo de Ralle (que non desapareceu, por certo), os petos de ánimas, e as tumbas de primeiros do XX.

Na Casa de Romualdo, en Taboada (Lugo), a familia conservou un impresionante e único retablo, colocado durante un cruceiro, que durante séculos estivo na eira da casa. É un caso case único en Galicia. O retablo aguantou a policromía orixinal por mor de que estivo protexido por un tellado. Agora, o cruceiro sostén o tellado da aira, hoxe convertida no espazo común desta fermosa casa de turismo rural do sur de Lugo desde a que exploramos o norte da Ribeira Sacra. E vaia se o é. Co selo Q de calidade turística, a casa combina unha atención excelente, gusto polos detalliños chulos, unha boa cociña (troitas con xamón, rabo de tenreira estofado…), un espazo precioso, cheo de libros e amor polo patrimonio local, xunto coa boa conversa dos seus propietarios. Todo isto a uns prezos moi competitivos: 58 euros noite, 4’90 euros o almorzo e 16 euros a cea.

¿Pero falabamos dun retablo curioso, verdade? Parecería mexicano, pero é arte popular galega, enraizada na sociedade tradicional e nos cultos relixosos labregos. Sol, Lúa, estrelas, santos devotos, e o curioso pasaxe da fuxida a Exipto. E, por certo, para liala máis, sostendo parte do retablo había o que debe ser un ara romana.

Detalle do retablo

Antes de ir durmir, subo a galería para miralo de fronte. Sempre lle atopo algo novo. Por exemplo, ¿víchedes a Lúa ao revés?