O timo das medias botellas

O outro día estabamos comendo nun restaurante da zona rural, ao que forzosamente é preciso chegar en coche. Creo que non me trabuco se digo que todas as mesas que estaban ao noso carón fixéronlle a mesma pregunta ao camareiro:

-¿Tes medias botellas?

A resposta a esa pregunta na maior parte dos comedores deste país pode ser frustrante. Ou directamente non as ofrecen, ou as poucas das que dispoñen non te interesan demasiado se non tes gustos moi clásicos. As adegas manteñen unha relación incomprensíbel e inexplicábel co formato da media botella. Malia o incremento dos controis de tráfico e das sancións por conducir cun nivel de alcolemia por riba dos niveis permitidos, moi poucas reaccionaron comercialmente á nova situación, ofrecendo aos seus clientes formatos máis asequíbeis como os que solicitaban todos os clientes deste restaurante, que o único que pretenden é poder disfrutar dunha ou dúas copas dun dos seus viños preferidos sen exporse a multaza, retirada de puntos e conseguinte situación bochornosa.

Xunto á escaseza da oferta, o segundo problema é máis grave: trátase da tremenda sensación de estafa que te invade se solicitas unha media botella no restaurante. Se o tamaño normal (75 cl.) dunha marca custa en restaurante 18 euros, a metade deste (35 cl.), custará a penas 14, cun desconto mínimo sobre o prezo normal. Con independencia dos motivos (gravames, custes de embotellamento, etc.), o prezo final é unha auténtica tomadura de pelo. ¿Onde está o custe dunha botella de viño, no seu interior ou no seu envoltorio?

Por iso, cando escoito a voceiros do sector do viño expresando a súa preocupación pola reducción do consumo derivada do endurecemento das normas de Tráfico, gustaríame saber por que continúan tendo un esquema tan ríxido de embotellamento, distribución e produción que os separa cada vez máis do que os seus clientes desexarían deles, e por que non se preocupan en ofrecer, de xeito complementario, medias botellas de boas marcas que poderían ser consumidas con comodidade en restaurantes, domicilios ou por xente que non quere ou non pode gastarse o diñeiro dunha botella de 75 cl. O mesmo acontece cos restaurantes: moitas veces a súa oferta de viños por copa que te ofrecen é nula ou moi escasa, pero esta oferta xa ten moitísimo auxe nestes momentos en Francia, en Italia ou Inglaterra, onde xogan con oito ou nove marcas de calidade e prezo razoábel para ofrecerlle aos clientes que non queren consumir unha botella completa ou queren probar varios viños.

É dicir, customizar, personalizar máis a experiencia de consumir viño e ofrecer o formato máis axeitado para cada momento.