Aclarador infográfico de baixas palestinas e israelís nos últimos ataques

Creo que onte lía un demagóxico artigo do filósofo Bernard-Henri Lévy en El Mundo sobre o conflito en Gaza. Bernard-Henri Lévy aseguraba que os israelíes estaban realizando unha acción o máis humanitaria posíbel. Lembremos, dicía o francés, que Hamás ten os seus cuarteis nos baixos dos hospitais. Todo palabras. Todo fume. Se ben a xente de Hamás me parecen fanáticos que ningún ben lle fan á causa palestina, a súa perversión de utilizar á poboación civil como escudos humanos das súas accións (os mortos alimentarán despois o seu exército de bombas humanas) non xustifica, desde ningún punto de vista, a acción israelita. Ou, precisamente por iso, debera evitala. E como eses, moitos argumentos penosos, lamentábeis e difíciles de xustificar. Podemos falar, argumentar o que queiramos, pero creo que este infográfico, que Moiz actualiza a partir da cobertura que fai a BBC do conflito, resume a situación. E logo veñen os poetas, os filósofos, os políticos a vestir a mona de seda.