Portable Light: un modelo de LEDs para implementar iluminación en comunidades indíxenas nómadas

Unha muller huichol examina o Portable Light

A tecnoloxía, sobre todo, debería valer para cousas coma esta. Explorando os contidos da colección de Design for the other 90%, que é unha colección do museo Cooper Hewitt de Nova York centrada en presentar pezas de deseño ideadas para facilitar a vida no Terceiro Mundo, atopeime co proxecto Nomads & Nano-Materials, da Universidade de Michigan e a empresa KVA, e pareceume brillante. Moita xente debera pensar neste esquema utilitarista da ciencia, en redistribuír o coñecemento que se distribúe en tecnoloxías para os países desenvolvidos, adaptándoa a contextos máis difíciles.

Trátase de crear todo un sistema de iluminación para comunidades indíxenas nómadas adaptado ao seu estilo de vida aproveitando os últimos avances en tecnoloxía dixital e aforro enerxético. O experimento realizouse cos Huicholes, un mítico grupo tribal da Serra Madre mexicana. “Os deseños textís”, aseguran os creadores, “integran antigas tradicións mesoamericanas de tecedeiras con luz dixital fornecida por semi-condutores de alto brillo (HBLEDs), placas fotovoltaicas flexíbeis e delgadas e baterías de polímeros, creando un sistema autocontenido e portátil de motores de luz que poden ser empregados a escala global alí onde é precisa iluminación e electricidade”. Os campesiños recargan co sol en pequenas placas solares os dispositivos, que permiten ter ao poboado luz suficiente pola noite ou para orientarse nos camiños.

(dossier en PDF)